على خفيف

يحكي لي صديق عزيز كان طيار بالكويتية

يقول :

كان ضمن دراستنا ( كيف تتصرف في حال الطوارئ )

فـ علمونا ان في الحالات الطارئة

1 - اول شي نسويه : ما نسوي شي

نطالع الوضع .. ندرسه .. نفكر في طريقة الحل

و بعدين نبدأ نتصرف


صراحة كلامه منطقي جدا .. جم واحد بواحد يبي يكحلها عماها و السبب العيلة !


مرة دقت علي ام سعد .. قالت : تعال بسرعة سعد يبكي

رحت البيت .. كان عمر سعد سنة .. و ريله داشة بين خشبتين من سور فراشه ..

الولد يصيح من قمة راسه .. و الريل بدت تصير زرقا

ذكرت وصية صاحبي .. وقفت و فكرت .. شلون دشت ريله اصلا ؟

قمت شلته بكبره و سدحته على بطنه .. و طلعت ريله !

يعني لو صاحبي مو معلمني .. جان كسرت الفراش و رحت شريت له واحد يديد


يا جماعة .. لو نفكر فيها شوي .. ترى مو بس بالحالات الطارئة

حتى في أمورنا اليومية .. لما نوقف و نفكر شوي .. نتصرف احسن .. و النتايج تكون احسن !


يسولف لي واحد يقول : اشوف اخوي الصغير يعاملني مثل ما يعامل ابوي .. بسبب فرق العمر بيني و بينه

قلت له : يعني تبيه يعاملك مثل ربعه ؟

قال : ايه

قلت له : عامله مثل ربعك !

سكت شوي .. قال : تصدق ما طرت علي ؟ بجربها !


هـ ـالفكرة يا جماعة بسيطة و منتشرة بين الناس و ما يبتها من عندي ولا انا فلتة زماني ..

و لو صاحبنا عطى الموضوع حقه من التفكير .. جان طرت عليه ..


مشكلتنا .. ندور الحل السريع ..

ما عندنا عشر دقايق حق التفكير .. لكن عندنا ساعات حق الهذرة و الكعكعة !

بعض الناس اذا الفتوى الفلانية ما دشت مزاجه .. يدور غيرها

يدور فتوى تضبط على هواه .. تناسب شهوته و لذته و فرحته الدنيوية

نسى ان الجنة غالية .. و الغالي ينتعب عليه

..

سأل أحد الناس عبد الله بن عباس- رضي الله عنهما- فقال له: ما تقول في الغناء؟ أحلال أم حرام؟

فقال ابن عباس: لا أقول حراما إلا ما ذكر في كتاب الله أنه حرام.

فقال الرجل: أحلال هو؟

فقال ابن عباس: ولا أقول حلالاً إلا ما ذكر في كتاب الله أنه حلال.

ونظر ابن عباس إلى الرجل، فرأى على وجهه علامات الحيرة.

فقال ابن عباس: أرأيت الحق والباطل إذا جاءا يوم القيامة، فأين يكون الغناء؟

فقال الرجل: يكون مع الباطل.

وهنا قال ابن عباس: اذهب فقد أفتيت نفسك .

..

اذا الواحد طاح مريض .. يروح الطبيب ولا يكتب حق روحه وصفة ؟

اذا سيارتك اختربت .. توديها الوكالة ولا تنادي السايق و تقعد انت وياه تحوسون بالمكينة ؟

اذا بغيت تفصل دشداشة يديدة .. تقط الخام على الخياط .. ولا تعطيه الخدامة عشان تسوي لك مريول ؟

الاجابات معروفة .. و سببها ان كل واحد من هذول صاحب علم وفن و له خبرة في مجاله

كذلك دين الله سبحانه و تعالى بحر .. من تفسير قرآن و حديث و فقه وغيره

ما يستوي رايك في مسألة شرعية مع راي واحد درسها دراسة

لكن هذا ما يعني انك تمشي مغمض ..

تعلم أساسيات دينك .. و لاتقول لي تعلمنا بالمدرسة لانه شوية و حدك ناسي نصه

وخل كلام النبي عليه السلام بين عيونك : ـ( ان الحلال بين و ان الحرام بين و بينهم امور مشتبهات فمن اتقى الشبهات فقد استبرأ لدينه و عرضه )ـ

و اذا كان همك رضى الله سبحانه .. ما تضيع

جاء في الحديث القدسي : ( وإن تقرب مني شبراً ، تقربت منه ذراعاً ، وإن تقرب مني ذراعاً ، تقربت منه باعاً )

والله المستعان

ايام الجامعة كان عندي دكتور تحفة

اشوه ان ربعي ماخذين نفس المادة عند نفس الدكتور قبلي بكورس

فقالوا لي دير بالك .. في الكويز الفلاني راح اييب لك سؤال اختيار متعدد ، لكن ما له اجابة


قلت : نعم ؟ و السواة ؟

قالوا : حط اجابة من عندك و اختارها

لووووول ..

دشيت الكويز .. و فعلا لقيت سؤال ما له اجابة .. وحطيت اجابة من عندي و اخترتها ( والله دنيا )

و عقب الكويز الطلبة قاموا يسألون بعض و كلموا الدكتور وهم محترين من السالفة

و الدكتور رد بكل برود : كان المفروض يوم انكم ما شفتوا اجابة .. تحطون اجابة من عندكم و تختارونها !

الكل كان معصب حزتها الا انا ميت ضحك و احمد ربي على نعمة العقل .. عيل شنو الفرق بين الاختبار المقالي و الموضوعي يا الحبيب ؟