على خفيف

كلمات خفيفة سريعة لطيفة و قد تكون احيانا ظريفة



لا أعرف عن والدي شيئا من الضعف ..

سمعت من غيره روايات عن صباه .. حين كان العراك يحتل منزلة عالية بين هواياته

تخرج من كلية الضباط وقد ازداد عنفوانا وصلابة .. كحال غيره من زملائه

كنت أرى منه القوة ورباطة الجأش في كثير من المواقف .. لعل أبرزها ايام الغزو

تعلمت منه ..

أن دمعة الرجل عزيزة ..

أنها لا تنزل أبدا ..

"افا .. ارفع راسك .. انت ريال"

نحتت في داخلي منذ الصغر

...

منذ سنة ٢٠٠٤

والوالد في صراع مع السرطان

تارة يشتد في القولون .. وتارة في الرئة .. وتارة في المخ

والآن هو في الرئة .. يضيق عليه التنفس .. و في العظام يؤلمه ويحرم عينه المنام

قبل أيام .. سمعته يحادث صديقا له فيقول : لا عليك يا ابا فلان .. فالكرسي المتحرك يقضي حاجتك و يسهل دروبك .. انت اقوى من ذلك كله .. استعن بالله ..

قد تظن عزيزي القارئ ان المتحدث هو صديق الوالد ..

لا !!

بل كانت هذه كلمات أبي .. يوجهها لصديقه الذي بلغ من الكبر عتيا ..

اذا كان هذا حاله .. فما الذي أبكاه ؟

...

ذهبت صباح اليوم لآخذ والدي للمستشفى

فلما ركب السيارة

قال : لم استطع الذهاب للمسجد لصلاة الفجر .. لم تستطع رجلاي حملي

وأخذ يبكي ..

اكمل وهو يدافع العبرات : اريد كرسيا متحركا "لا تفوتني الصلاة"

واسيته بما لا يخفى عليكم

حتى إذا دخل عيادة العلاج الإشعاعي

غلبتني عبراتي .. فكم من صلاة نمت عنها .. ولم تدمع عيني ؟

وكم من واجب قصرت فيه .. ولم تدمع عيني ؟

وكم من باب خير أُغلق دوني .. ولم تدمع عيني ؟

أثر فيّ جدا .. أنه أجلد مني عند الجد .. وأرق قلباً أمام رب العالمين .. احسبه والله حسيبه ..

و أنت أيها القارئ .. هل تدبرت حديث النبي عليه الصلاة والسلام : ( امسك عليك لسانك ، وليسعك بيتك ، و ابك على خطيئتك ) ؟

اللهم آجر والدي في مصيبته .. واكتب له الشفاء العاجل

واجعلني و من يقرأ هذه الكلمات ممن خافك واتقاك واتبع رضاك ..

رجعت الكويت 

يا حلو الديرة و يا حلو اهلها

اشتقت حق الناس الطيبة .. اللي اعرفها واللي ما اعرفها .. يكفي انك بين ناس نظيفة قلبا و قالبا

يا ناس والله انكم على راسي يا اهل ديرتي واهل خليجي ..

تدرون منو اللي يبط جبدي ؟

اللي يروح اوروبا يومين و يرجع لي بتصريح : رأيت الاسلام ولم أرى المسلمين !

أي إسلام يرحم لي امك ؟

ناس مصلحجية يركضوووون ورا الدينار ركض ليلهم و نهارهم

منبهر انت بتعاملهم في العمل ؟ و بدقة مواعيدهم ؟ و بنشاطهم في الشغل ؟ 

انا بقول لك ليش جذي .. لان الشغل عندهم هو الحياة !

تشتغل .. تاخذ فلوس .. ما تشتغل .. تنطرد ..

تناااافس كبير في مجال العمل وكل واحد يشوف مصلحته وبس ..

أخلاق العمل اللي عندهم سببها الدينار .. و لو تختفي الرقابة عنهم ثواني تختفي أخلاق العمل هذي ..

انا تعاملت مع ناس حرامية محترفين هناك .. وهم اطباء .. استشاريين !

واللي تشوفه بالدوام يرحب و يهلي .. تشوفه بعد شوي بالحديقة .. ما يسلم ولا يبتسم لك حتى !

ليش ؟ لان الحين ما وراك فلوس ..

تبي نتكلم عن اخلاقهم ؟ تعال شوفهم بآخر الاسبوع .. شوف الخمر شنو تسوي فيهم .. تكره نفسك لانك بينهم !

تبي نتكلم عن حياتهم الاجتماعيه ؟ ولا مسلسلاتهم و افلامهم نقلت لك الصورة ؟

يربون كلااااب لان الكلب وفي .. و هو اللي يصفى لهم بعد ما الناس تتركهم .. لانه يسد الفراغ في حياتهم !

تبي نتكلم عن العنصرية ؟ ماني متكلم عنها .. يبي لها كتاب بروحها !

تبي نتكلم عن الدين ؟ 

شنو تبي نتكلم عنه ؟

اي اسلام هذا اللي شفته يا عسى ربي يفتح عيونك و بصيرتك ؟

حصرت الاسلام بالمواعيد و الهمة في الشغل ؟

روح بس واللي يخليك !


---

ملاحظة : مابي احد يفهم من كلامي اني ما احب الاجتهاد في العمل ولا احب ان الواحد يرضي ربه و يحلل راتبه .. لكن لا تقول لي هذا الاسلام و بس !

---

كتبت في تويتر قبل يومين : هل تأيد مقولة من زار الغرب و قال : رأيت الاسلام و لم أرى المسلمين ؟

٤ بس اللي ردوا علي .. و هذي ردودهم :

سليمان : أتوقع تنطبق على المعاملة فقط ،أما اجتماعيا فمفككون، أخلاقيا منحلون،عقائديا منحرفون..فبرأيي من الخطأ أن نقول رأينا الإسلام في الغرب

عبدالله : لا ، المفروض يقول رأيت حرص على الدنيا ولا يعرفون حتى دينهم

جاسماعتقد يقصدون فيها من ناحية التنظيم والترتيب فقط ، اما اخلاقهم ترا خايسه! غير مشربهم ومأكلهم وملبسهم وعاداتهم!! هل هذا "اسلام"؟؟

فهد : طبعا لا أؤيدها لعدة أسباب: قد يكون للغرب بعض الاخلاق الحميدة مثل احترام الوقت وتقديس العمل وعدم الغش. ولكن ليس هذا الاسلام فقط . فالاسلام توحيد الله في العبادة والطهارة من النجاسات والعفة وبرالوالدين وغيره الكثير مما لايوجد في الغرب


للي عندهم تويتر .. اتشرف فيكم : @bosa3ad





مساكم الله بالخير

قبل سنين تعورت وانا العب كرة ..

و جبسوا ريلي ٣ اسابيع .. بعدين قالوا الجبس غلط .. وجبسوها ٥ اسابيع زياده

و من ذيج الايام تنتفخ ريلي كل فترة .. اروح الرازي .. يقولون بروده .. دفها وهاك دهان روبيكالم !

واقعد اسبوع او اسبوعين .. بعدين تخف و ارجع اعيش حياتي

هالمرة انتفخت علي وانا بلندن .. جان اروح الطبيب

فحصها .. قال عندك الم غريب في هالمكان .. ودي لو تسوي اشعة لاني شاك بشيء !!

سويت .. قال الطبيب : عندك عظمة مكسورة و قاعدة تتحرك كل فترة و تجرح الانسجة من داخل .. وتنتفخ ريلك !

يا سلام ؟! يعني متأكد مو برودة ؟!

قلت له : بس هم مجبسينها .. 

قال : هذي العظمة ما تنجبر .. مكانها ما ينفع معاه لا جبس ولا غيره .. الحل ازالة العظم المكسور بعملية جراحية بسيطة ..

و فعلا .. سويت العملية من ٣ اسابيع تقريبا .. والحمدلله متفائل فيها

ماني متكلم عن الفرق بين الطب هني و هناك .. لاني متأكد انكم مليتوا من الموضوع

بسولف لكم عن لندن بصحبة العكاز ..

---

لما تركب الباص .. الكراسي الامامية للكبار في السن و المعاقين ..

طبعا فيه ناس محترمة .. لما يدش شايب او عيوز يقومون لهم ..

هالناس المحترمة انا كنت ادورها لما اركب الباص

و اكتشفت انهم شوية .. لدرجة مرات اضطر اوقف !!

و سايق الباص مرات يحب يتغشمر وياك

لما تركب و تطق كرتك .. ينطرك تاخذ خطوة وحدة عشان ما يكون يمك شي تقضب فيه .. و يدووووووس

يساعدك توصل مكانك بسرعه

التكاسي ؟ 

ماكو رحمة .. تعبر الشارع والتكسي يايك طااااير .. بيدك عكاز  ويل تشير  جنازة مااااله شغل

حسيت باحساس العتوي اللايث اللي لا اقبلت عليه السيارة ما يدري يرجع الرصيف ولا يعبر الشارع

يهال و كبار مستعيلين يشوتون العكاز 

ليتها واقفة عالعكاز !!

مرة وحدة شاتت ريلي اللي تعورني بغيييت اتكرفس !!

غلطااااااانة حجية .. طبي لي سلايت بعد ؟

---

بديت علاج طبيعي من اسبوع تقريبا .. من ضمن البرنامج .. اروح الحديقة .. احاول امشي عشرين خطوة قصيرة متوازنة .. بدون عكاز

مشكلتي ما اراعي مشاعر الناس ..

ياي عالعكاز فجأة وانا امشي ارفعه و امشي بدونه

لا تشوف ردة الفعل على ويوه خلق الله .. على بالهم الكاميرا الخفية

انزين يا بو سعد رحم الله والديك اوقف شوي .. ارفع العكاز شوي شوي .. سو نفسك تحاول تمشي .. تلفت يمين و يسار يعني انك خايف احد يحوشك .. حسس الناس انك فعلا قاعد تتمرن ياخي

---

دشيت مطعم مع واحد من الربع .. و اللي يشتغلون يقولون لي سلامات وما تشوف شر الخ ..

تعشينا و قمنا ..

وانا عند الباب واحد يصوت علي : اغراضك اغراضك ..

طلعت ناسي العكاز

والناس تطالعني و تضحك ..

بالله شلون يترقع هالموقف ؟ احلف لهم اني مو جذاب مثلا ؟!  


---


عاد تصدقون .. حسيت بنعمة المشي .. و ربي نعمة كبيرة حيييييييل ..

و حسيت بنعمة السيااااارة .. تمنيت لو عندي كريسيدا ٩٦ ولا هالبهذلة ..

والله يا نعم عندنا ما نحسب لها حساب .. ولا نعزها ولا نقدرها الا لما نفقدها ..

الحمدلك يا ربي .. 

"و إن تعدوا نعمة الله لا تحصوها"