على خفيف

كلمات خفيفة سريعة لطيفة و قد تكون احيانا ظريفة

Photobucket


ما احب تحليل الشخصية في النت .. لانه غالبا خرابيط

لكن طاحت عيني على مدونة بو هارون ..

و لقيت فيها اختبار بسيط من 28 سؤال .. و حليته

و طلعت شخصيتي مطابقة .. و طلعت بعض الاسرار في شخصيتي اللي ما اظن احد يعرفها !

لكن لازم يكون الواحد دقيق في حل الاسئلة .. لانها جدا دقيقة و النتيجة تفرق

تفضلوا الرابط

http://www.abuharoon.com/?p=700

ملاحظة : هذا البوست يقع ضمن تصنيف "ماكو فايدة" .. ما انصحك تقراه


Photobucket

** بعدستي .. خور جزيرة حوار


تونا رادين من
البحرين ..

انا و ثلاثة من الربع

و استقبلونا هناك ربعنا البحرينيين اهل الكرم و الطيبة

استانسنا على كلامهم و استانسوا على كلامنا

لكن فيه مشكلة في بعض المفردات
القلجة

احمد البحريني قال : عيل ما تعرفون
سنطرة ؟

قالوا الربع : شنو سنطرة ؟


قال : يعني مثل هذا و يأشر على العصير اللي بيده

قالوا : عصير ؟


قال : لا

قالوا : مسطرة ؟

قال : لا بس قريب .. شنو شي مدور هالكبر ؟ ( و سوى بإيده شكل
رقية )

قالوا : رقية

قال : و اصغر شوي ؟

قالوا : بطيخة

قال : و اصغر شوي

قالوا : بطيخة صغيرة


المهم .. قعد احمد يشرق و يغرب فيهم .. و اييب لهم اشياء ما لها علاقة ببعض


آخر شي .. قال لهم : شفتوا اللي قلناه كله ؟ حطوه مع بعضه يطلع لكم سنطرة !


طبعا الاجابة الصحيحة كانت : افندي !


البحرينيين يسمون الافندي سنطرة


واحد من الربع انبطت جبده .. ساسرني : بو سعد تكفى نبي كلمة صعبة


قلت :
كنقية !

قال احمد البحريني : شنو كنقية ؟


اووووووووووه تعدلوا له الربع


الربع : ما تعرف الكنقية ؟

احمد : يعني يمكن كنج ملك ؟ يعني بنت الملك ؟

الربع : تقريبا .. شي قريب من بنت الملك .. يعني شوف
الكاكاو هذا اللي بيدك لا تاكله كله .. بس اقرم منه شوية و طالع شنو داخله ؟

احمد : فستق يعني مكسرات ؟

الربع : تقريبا .. بس خلك على بنت الملك اقرب لك


احمد قعد يحاول .. و الربع يشرقون ويغربون فيه
.. الا واحد قرب له حيل

انا انبطت جبدي .. خلنا ياخي نسوي فيه مثل ما سوى فينا

نطيت قلت له : يعني مثلا يا احمد انت ماشي
بالشارع و تمر عليك كنقية

ماتوا الربع ضحك .. رديت بكل ببراءة : قوية ؟
قالوا : اي

قلت : خلاص انا آسف .. تخيل انك ماشي بالشارع و تمر على كنقية


قال : كبينة تلفون ؟

و استمر مسلسل الكنقية الى ان قالوا : شفت اللي قلناه كله ؟ حطه مع بعضه تطلع لك كنقية


بعدين شرحوا له معنى الكنقية

لكن صار اسم
الكاكاو هذاك كنقية

يعني لو داش علينا كويتي و سامعنا : خالد قط علي كنقية
.. جان قال مينن


كل هذا كان في جزيرة حوار

جزيرة حوار تبعد عن المنامة بالعبارة
ساعة و نص و بالطراد ساعة ..

فيها فندق حلو .. لكن كان تحت الصيانة فـ ما دشيناه ..

فيها شاليهات شغل الكويت قبل الغزو .. خشب و جبسنبورد

خذينا اكبر شاليه عبارة عن صالة صغيرة و غرفة اصغر و حمام و مطبخ .. و فيه ثلاجة و جولة و تلفزيون صغير ..

ماكو قنفات


بحرها فيها صخر و طينة .. و الظاهر هالايام موسم
الدول

ما انصح عوايل يروحون الشاليهات .. بس اذا شباب و معاهم طرادهم .. يستانسون