على خفيف

دشيت على واحد من الربع بالدوام .. قاعد عنده واحد ما اعرفه

و هاللي ما اعرفه يسولف :

عيل احنا يوم كنا يهال .. كنت اييب الشهادة حق الوالدة سيدا لا يشوفها الوالد

تقول لي : هــَو هـــَو دويحتين ؟

- شخباري دواويح -

و تكمل كلامها : الحين بالله شقول حق ابوووك ؟

الا بدشة الوالد : شمسوي بعد ؟ ايا الـ ......... ! دويحتين ؟

و يطقني .. و تقوم الوالدة تطب علي عشان تصير الطقة فيها

وانا اصارخ : يماااه خليه يطقني وايد ارحم .. فقصتيني


---


دفاع الامهات عن الابناء بدافع العاطفة البحتة .. شرايكم فيه ؟

انا رايي ان الوالدين لا بد يكون بينهم تعاون

و ان واحد يرفع و الثاني يجبس

واحد يشد و الثاني يلين

لكن بدون تضاد

يعني ما يصير الابو يعاقب الولد .. و الام تكسر كلمة الابو و تكافئه

و تربية الطراق صعبة تتطبق بهالزمن ..

لانه ايام قبل كان الطراق ايي من كل صوب ..

من الجار .. من العم .. من الخال .. من رفيج الابو ..

الفريج كله يربي الولد ..

لكن اليوم محد يهتم بتربية ولدك غيرك .. و يمكن لو احد يهتم انت تقول له : اطلع منها !!

البديل هو استخدام الطرق اليديدة اللي تدرس نفسية الطفل و تحط لك شغلات بسيطة و عملية توصلك حق اللي تبيه ..

اللي عندهم يهال من سنتين الى 13 سنة .. فيه كتاب حلو ينباع بمكتبة جرير

اسمه "حاول ان تروضني"

قريته و استفدت منه وايد ..

فيه وحدة كاتبة تلخيص حقه على هذا الرابط

و اللي يحب يفيدنا بكتاب قراه عن الموضوع .. نكون له شاكرين