على خفيف

ملاحظة : هذا البوست ما منه فايدة .. روح سو لك شي مفيد احسن لك !

اذكر ايام الجامعة كان مبنى 3خ فيه موزع عود اول ما تدش .. صاير مثل صالة تلوع الجبد

لا مريت فيها من اللجة ما تسمع اللي يمك .. تقول زرازير بسدرة

و غير هذا .. تشوف العالم واقفين و قاعدين بكل مكان ..

يعني احيانا البنات يحطون الكراسي بويه الممر و يخلون مكان حق اثنين يطوفون فقط لا غير !

و المكان يخترش و زحمة .. و هذول ولا همهم .. صج قلة ادب ..

مرة كنت داش انا و عزيزي بو طلّي و نبي نصعد فوق ..

ولا بنات قاعدين على الدرج - العرييييييييض - يم بعض .. و مخلين مكان حق واحد يطوف .. بالعرض !!!

صراحة انقهرت من قلة ادبهم .. و التفت على بو طلّي و قلت بصوت عالي : طلال عندك خردة ؟

انا معصب .. طلال مات ضحك .. والبنات - قليلات الادب - بين وحدة تضحك على روحها و وحدة ساكتة ولا همها !

من المواقف اللي تتكرر وايد ..

لو كنت في مختبر مختلط .. و تبي تاخذ 5 مليلتر من محلول معين ..و صاف بالدور و جدامك بنات

ما راح تلصق فيهم طبعا .. بتخلي مسافة شوي

راح اتيي وحدة و تدعس روحها جدامك و تخليك انت اللي ترجع خطوة !

يعني تخطرك لانها تدري انك ما راح تناجرها .. بحكم انك منحرج او محترم الخ ..

و اغلب الشباب يسكتون ولا يتكلمون .. لانهم يستحون !

و نفس الشي عند مكاتب الدكاترة .. اذا وقفت تنطر عند دكتور .. عادي جدا يدشون بنات قبلك مع انهم يايين عقبك ! و اذا حاولت تدش قال الدكتور : انطر شوي خل يخلصون .. ما عليه !

ليش ما عليه ؟ مكافأة لانهم مو محترمين روحهم ولا محترمين الناس ؟

هذا غير اللي اتييك تبي "النوت" مالك ..

انزين خلصوا البنات اللي بالسكشن عشان تاخذين نوتي ؟

مرة بعد ما طلعت من محاضرة .. نادتني وحدة بـ اسمي

انا قلت يمكن وحدة تصير لي او بنت جيراننا ..

التفت .. ولا وحدة ما اعرفها ..

على طول قالت : ممكن النوت ؟

جذي سيدا ؟ تناديني باسمي .. و ممكن النوت ؟

لا "لو سمحت" لا "اخوي" لا احم لا دستور ؟

والله يا جماعة من كثر ما بطت جبدي ..

عطيتها نظرة من فووووق لي تحت .. و خليتها و مشيت

شنو هالميااااانة ؟ اخاف لاعب معاج جنجفة بالديوانية ؟

ولا متبادل معاج اشرطة سيجا ايام المتوسط ؟

صج .. اذا لم تستح فاصنع ما شئت !

يحكي لي صديق عزيز كان طيار بالكويتية

يقول :

كان ضمن دراستنا ( كيف تتصرف في حال الطوارئ )

فـ علمونا ان في الحالات الطارئة

1 - اول شي نسويه : ما نسوي شي

نطالع الوضع .. ندرسه .. نفكر في طريقة الحل

و بعدين نبدأ نتصرف


صراحة كلامه منطقي جدا .. جم واحد بواحد يبي يكحلها عماها و السبب العيلة !


مرة دقت علي ام سعد .. قالت : تعال بسرعة سعد يبكي

رحت البيت .. كان عمر سعد سنة .. و ريله داشة بين خشبتين من سور فراشه ..

الولد يصيح من قمة راسه .. و الريل بدت تصير زرقا

ذكرت وصية صاحبي .. وقفت و فكرت .. شلون دشت ريله اصلا ؟

قمت شلته بكبره و سدحته على بطنه .. و طلعت ريله !

يعني لو صاحبي مو معلمني .. جان كسرت الفراش و رحت شريت له واحد يديد


يا جماعة .. لو نفكر فيها شوي .. ترى مو بس بالحالات الطارئة

حتى في أمورنا اليومية .. لما نوقف و نفكر شوي .. نتصرف احسن .. و النتايج تكون احسن !


يسولف لي واحد يقول : اشوف اخوي الصغير يعاملني مثل ما يعامل ابوي .. بسبب فرق العمر بيني و بينه

قلت له : يعني تبيه يعاملك مثل ربعه ؟

قال : ايه

قلت له : عامله مثل ربعك !

سكت شوي .. قال : تصدق ما طرت علي ؟ بجربها !


هـ ـالفكرة يا جماعة بسيطة و منتشرة بين الناس و ما يبتها من عندي ولا انا فلتة زماني ..

و لو صاحبنا عطى الموضوع حقه من التفكير .. جان طرت عليه ..


مشكلتنا .. ندور الحل السريع ..

ما عندنا عشر دقايق حق التفكير .. لكن عندنا ساعات حق الهذرة و الكعكعة !